رسالة مو مثل باقي الرسايل
هلا بطفلتي و حبيبتي و روحي، نزلي جوه طفلتي.
مراح احجي اعذار ولا مبررات، اني غلطت، و اعرف بروحي غلطان.
بس والله مو قصدي ولا اريد، و يعني والله ما اعرف شنو احجي بس اني احبج طفلتي.
و ما اتمنى تنكضي ثانيه من حياتنا و احنا ضايجين او زعلانين، و اتمنى كل ايامنا تكون سويه و احنا فرحانين.
مشاكلنا بسيطة، وأغلبها من التعب مو من قلة الحب. بس آني الي كبّرتها؛ مرة بسكوتي، ومرة بحجيي، ومرة لأني دافعت عن نفسي أكثر ما دافعت عننا.
والغيمة، شكد ما تصير ثكيلة وسودة، تمشي. الهوا ياخذها وتروح. و السما تضل سماوية مثل ما تحبينها إنتي.
واحنا أكبر من زعلة يومين. أكبر من كلمة طلعت غلط، وأكبر من ليلة نمنا بيها وكل واحد يريد يخنك الثاني.
الصدك؟ آني خايف. خايف أخسرج، وبدال ما أكول هالحجي بوجهج، أطلع عصبي أو أسكت وأخليج تفسرين بكيفج (تفسرياتج ما ادري مننين تجيبيهن انوب).
من تزعلين، الدنيا تصير هوسه عليّه. ما أعرف أنام ولا أعرف أشتغل، و يومي كله يصير ناقص لدرجه.
بس (الحمدلله) عندي شي مو الكل عدهيا: إني أحاول وأرجع أحاول، وما أمل من المحاولة ما دامت إلج.
كل اسم بيهم مو مجرد كلمة أكولها وتمر. كل واحد بيهم مزاج من أمزجتي وياج؛ يوم أدلّلج، ويوم أحن عليج، ويوم أشتاق إلج وإنتي كبالي.
وكلهن إلج إنتي بس. ماكو وحدة ثانية سمعتهن، ولا راح تسمعهن.
اي شي يخصج، و اي شي بيج، و كل خليه بيج، و كل هوا تتنفسي، و كلشي كلشي.
أضل أحبج طول عمري. مو حجي زعل ولا حجي ليلة، هاي الحقيقة الي عايش بيها.
لو تنكلب الدنيا، ولو يجي الحر، ما أعوفج. وإذا غلطت مرة لخ — وراح أغلط لأني بشر — أرجع أعتذر وأرجع أصالحج، ميّة مرة وألف.
وأوعدج بشي أهم من الاعتذار: راح أتعلّم. أتعلّم أسكت وين ما لازم أسكت، وأحجي وين ما لازم أحجي، وأسمعج للاخير قبل ما أرد.
ماكو وحدة غيرج، ولا راح تجي. إنتي الأولى وإنتي الأخيرة، وإنتي الشي الوحيد بحياتي الي احبه هيج حب.
وإذا تسألين ليش؟ لأن كل شي حلو بيّه صار بسببج، وكل شي مو حلو بيّه يتصلح من خلالج.
ومن اليوم لآخر يوم بعمري، اسمج هو الجواب لكل سؤال يخص قلبي.
رجعت السما صافية.
أحبج دندونتي… طول عمري وبلا شروط. وهذا الدبدوب الي وصّلج الرسالة، خليه عندج — كل ما تزعلين، رجعيه ويّاج لهنا.